Info Adicional
Instalaciones. O IES Xulián Magariños dispón de:
- Salón de actos con capacidade para 150 persoas sentadas
- 1 Ximnasio e 1 pavillón polideportivo cos respectivos vestiarios
- 1 Aula de música
- 2 Aulas de debuxo e Educación plástica
- 1 Taller de tecnoloxía
- 3 Laboratorios de Bioloxía, de Física e de Química
- 3 Aulas de informática de uso xeral para alumnado de ESO e Bacharelato
- 4 aulas técnicas para alumnado dos ciclos de informática
- 1 Taller de Informática para alumnado de ciclos
- 1 Taller de comercio
- Biblioteca de 100 m2
- 1 estudo de televisión (XEMA TV)
- 1 aula de idiomas
- 1 sala de arquivo e estudo de documentación relacionada coa comarca de Barcala (CEIBAR)
- Zonas axardinadas
- Patio con canchas deportivas
- Zona de patio cuberta (200 m2)
- Parking
- Cafetería
- Zona de exposicións temporais habilitada na cafetería
Historia
Na comarca barcalesa (concellos de Negreira e A Baña), ata 1981, quen quería superar os estudos primarios tiña tres opcións: marchar fóra, prepararse por libre na Academia de Negreira ou a FP Agraria ofertada no Colexio Rural. Pero dende o curso 1981-82, a vila do Cotón, e para a contorna toda, ofreceu unha novidosa e útil opción ó alumnado: o Colexio Municipal Homologado de Bacharelato (CMHB) –sempre chamado Instituto–, que levaba dereito ó título de bacharel, impartindo os estudos de BUP e COU. Abría as portas á FP superior e á Universidade. Nesa década de 1980 para as xestións administrativas e documentación oficial, o CMHB de Negreira dependía do Instituto de Ordes.
Esas aulas á beira do Parque do Coto chegaron ata o curso 1989-90, cando o CMHB creceu e estreou o actual edificio tamén na Rúa de Castelao, pasando a ser Instituto de Educación Secundaria e Profesional (IESP) con varias vías na Secundaria.
Nesta etapa inicial foron directoras do CMHB dúas profesoras. Inicialmente Mercedes Salvado Martínez (Xeografía e Historia 1981-1986), á que seguiu Primitiva Ludivina Isidro Gómez (Lengua Española 1986-1990), quen exerceu a súa dirección ata o remate do curso de transición (89-90), durante o cal o Colexio Homologado se transformou definitivamente en IESP.
Este novo IESP continuou no curso 1990-91 e 91-92 coa dirección do profesor Manuel Pombo Sánchez (Filosofía). No curso seguinte 92-93 estreou o nome de “Xulián Magariños” sendo director Agustín Carracedo Santos (Filosofía, curso 92-93). Nos anos seguintes a dirección do centro recaería en Eusebio Ónega Carrera (Xeografía e Historia, 93-96), Cecilia Pensado Banet (Matemáticas, cursos 96-99, quen se encargaría de pilotar a complexa implantación da LOGSE no curso 98-99), Jaime López Otero (Comercio, cursos 99-04) e Adelino Pose Reino (Matemáticas, entre os anos 2004 e 2018). Dende o presente curso académico 2018-2019 asume a dirección Clara Cristela Rodríguez Núñez (Xeografía e Historia).
En todo este tempo a cifra do alumnado matriculado neste centro, dende que se converteu en IES, sempre superou os 350 estudantes, acadando a cifra máxima cos 531 matriculados do curso 1998-99, e cun cadro de persoal de entre 45 e 60 docentes.
No que se refire á oferta educativa, ademais do ensino de BUP e COU (substituídos pola ESO e bacharelato a partir do curso 98-99), compre sinalar que en 1990 implantouse o ensino de Técnico medio de Administrativo que pasou a ciclo medio de Comercio en 1998. En 2001 implantouse o ciclo superior de Informática. En 2015 comezou o ciclo básico de servizos comerciais reemplazando ao anterior Programa de Cualificación Profesional Inicial PCPI. Xa en 2018 deixou de ofertarse o ciclo medio de Comercio pola escasa demanda e inaugurouse o ciclo medio de Informática.
As instalacións do centro tamén acollen unha Sección da Escola Oficial de Idiomas de Santiago, aberta a partir do curso 2010-2011.
O 3 de decembro de 2011 tivo lugar a celebración da xornada 30 anos de Ensino Secundario en Negreira (1981-2011), cunha serie de actos conmemorativos.
Son trinta e sete anos de camiño nunha realidade educativa que lle deu a moitas promocións xuvenís máis ampla formación, mellores perspectivas profesionais e, en suma, itinerarios misceláneos para encarreiraren as súas vidas. Nesta ruta do Ensino Secundario en Negreira hai moitos condutores e viaxeiros de toda a comunidade escolar, no servizo á Comarca de Barcala.
